Preposicion y interheccion di Papiamento

0.49 MB·Papiamento

by  Maureen Luidens

PREPOSICON Y
INTERHECCION DI
Papiamento
Pedro Velásquez
Etley Lasten
Juan Maduro
Magriet Pourrier
Filomena Schwengle
Ramon Todd Dandaré
Colofon
Prome edicion © 2016 Departamento di Enseñansa
Financiamento:
Edicion na encargo di: Proyecto Idioma den Enseñansa
Redaccion: Maureen Luidens
Diseño grafico y layout: Sheila Werleman
Kaft: Museo Arqueologico Nacional Aruba
ISBN: 978-99904-68-38-0
Imprimi na Aruba
No ta permiti reedicion di (parti di) e buki aki sin permiso di
e editor. Ta permiti si pa copia of transmiti (parti di) e buki
aki pa uzo practico pa meta educativo, bou di condicion cu
no ta trece ningun cambio den su contenido.
Prologo
E texto den e publicacion aki a wordo skirbi prome cu
publicacion di e buki “Manual di gramatica di Papiamento
– Morfologia” (Departamento di Enseñansa 2010), den
cual tambe ta trata e categorianan gramatical preposicion
y interheccion. Sinembargo, mirando cu e trabou den
e publicacion aki ta uno mas amplio cu den e manual
menciona, Departamento di Enseñansa a dicidi di publica e
trabou aki asina mes, pa brinda tur usuario e posibilidad di
uza esaki como material di referencia adicional.
A laga e texto original manera cu e tabata, cu excepcion
di algun adaptacion ortografico necesario y algun otro
cambio chikito di redaccion. Nos ta spera cu e trabou aki
por contribui na trece mas claridad y menos confusion ora di
uza preposicion y interheccion na Papiamento.
Presentacion*
E trabou gramatical cu Comision di Gramatica ta presenta
na Maneho di Idioma ta consisti di dos capitulo dedica na
dos categoria gramatical, esta preposicion y interheccion.
E dos capitulonan aki – originalmente – lo forma parti di un
proyecto mas amplio cu tabata tin como obhetivo descripcion
di un gramatica completo. A trata e categorianan gramatica
l aki cu cierto prioridad pa motibo cu e gramaticanan di
Papiamento existente – por lo general – no ta duna atencion
na e categorianan aki. Un ke otro ta conta principalmente pa
preposicion. Ademas di esey nos a tene cuenta tambe cu
e echo cu den desaroyo di Papiamento awendia nos ta mira
evidentemente y frecuentemente cierto confusion den uzo di
e preposicionnan.
E prome concepto di un gramatica completo tabata tin
como obhetivo un gramatica cu un formato “intermedio” o
sea entre un gramatica basico y un gramatica exhaustivo.
Den transcurso di e trabou di elaboracion, e planificacion
y e concepto di e trabou a cambia, den sentido cu a opta
pa un gramatica “basico”. Consecuentemente mester limita
e extension di e corpus pa trata y reduci profundisacion
di e descripcion analitico, principalmente den caso di e
preposicionnan. P’esey a limita tratamento di e corpus di e
preposicionnan simpel na esnan mas importante y a trece
padilanti solamente un parti limita di e otro subcategorianan:
preposicion componi y expresion preposicional. Tambe
t’asina cu e descripcion analitico di e relacionnan di e
preposicionnan simpel a bira somero y den e caso di e
otro subcategorianan solamente ta caracterisa nan “forma”
someramente sin trata nan relacionnan.
E cambio di concepto di e gramatica a trece cu ne cu e
formato “basico” di e dos categorianan cu nos ta presenta ta
un “derivacion” di un formato “intermedio”. Nos ta consciente
cu den e proceso di derivacion aki algo lo por a keda di e
formato intermedio anterior.
E grupo destinatario cu nos tabata tin na bista ta na prome
luga tur e maestronan di scol relaciona cu siñamento y
docencia di Papiamento. Pero tambe – den e mesun ambito
di enseñansa – e studiantenan di Papiamento. Ademas
di esey – mirando fuera di e area di enseñansa – nos ta
sigur cu e trabou aki tambe lo por ta util como guia pa e
periodistanan y tur esnan interesa pa conoce structura di
Papiamento.
E comision cu a traha riba e trabou gramatical aki tabata
consisti di e siguiente integrantenan: Etley Lasten, Juan
Maduro, Magriet Pourrier, Filomena Schwengle, Ramon
Todd Dandaré y Pedro Velásquez.
Na nomber di e Comision di Gramatica
Pedro R. Velásquez – coordinador
juli 2006
*Mira Prologo
Contenido
1 PREPOSICION 1
1.1 Definicion 1
1.2 Forma 1
I. Preposicion simpel 1
II. Preposicion componi 1
III. Expresion preposicional 2
1.3 Clasificacion y uzo di Preposicion simpel 2
1.3.1 Cerca 2
I. Relacion di espacio 2
II. Caracteristica 3
1.3.2 Contra 3
I. Relacion di espacio 3
II. Relacion di oposicion 3
1.3.3 Cu 4
I. Relacion di compania 4
II. Caracteristica 5
III. Modo 5
IV. Circunstancia 5
V. Medio 5
VI. Preposicion fiho 6
1.3.4 Den 6
I. Relacion di espacio 6
II. Relacion di tempo 7
1.3.5 Di 8
I. Relacion di posesion of pertenencia 8
II. Relacion di espacio 8
III. Relacion di tempo 9
IV. Relacion di material 9
V. Relacion di cantidad 10
VI. Relacion di contenido 11
VII. Relacion di referencia 11
1.3.5.1 Di cu sustantivo colectivo 11
1.3.5.2 Di como preposicion fiho di verbo 12
1.3.6 Entre 12
I. Relacion di espacio 12
II. Relacion di tempo 13
III. Relacion di reciprocidad 13
IV. Relacion di estado 13
V. Relacion di comparacion 14
1.3.7 Na 15
I. Relacion di espacio 15
II. Relacion di tempo 15
III. Relacion di modo 16
IV. Relacion di medio 16
V. Relacion di cantidad 16
VI. Relacion di referencia 17
1.3.8 Pa 18
I. Relacion di espacio 18
II. Relacion di tempo 19
III. Relacion di causa 19
IV. Relacion di agente 19
V. Relacion di intercambio 20
VI. Relacion di comparacion 20
VII. Relacion di frecuencia 20
VIII. Relacion di secuencia 21
1.3.9 Riba 21
I. Relacion di espacio 21
II. Relacion di modo 22
1.3.10 Te 23
I. Relacion di espacio 23
II. Relacion di tempo 23
2 INTERHECCION 25
2.1 Expresion emocional 25
2.2 Otro funcion 26
2.2.1 Apelativo 26
2.2.2 Afirmacion 26
2.2.3 Saludo y despedida 26
2.2.4 Palabra onomatopeyico 27
Literatura consulta 28
1 Preposicion
1.1 Definicion
Den termino general un preposicion ta expresa un relacion
entre dos entidad: esun representa pa e complemento
preposicional y e otro representa pa un otro parti di e frase.
E complemento preposicional semper ta un sustantivo,
un pronomber, un parti di frase of un frase. E preposicion
semper ta para dilanti di e complemento preposicional:
E cas di mi tata.
Den e caso aki mi tata ta e complemento preposicional.
1.2 Forma
Segun nan forma nos por parti preposicion den tres
diferente sorto: preposicion simpel, preposicion componi y
expresion preposicional.
I. Preposicion simpel
Preposicion simpel nos ta yama un preposicion cu ta
consisti di un solo palabra, manera: cerca, contra, cu, den,
di, entre, na, pa, riba y te.
II. Preposicion componi
Preposicion componi ta un preposicion cu ta consisti di dos
of mas palabra, manera: banda di, bou di, cerca di, dilanti
di, door di, for di den, memey di, pabou di, pafo di, panort
di, pariba di, paseit di, patras di, rond di y tras di. Manera
nos por ripara, den Papiamento e preposicionnan componi
generalmente ta forma pa un adverbio (cerca, dilanti,
memey, pabou, patras etc.) sigui pa e preposicion di. 1
III. Expresion preposicional
Expresion preposicional nos ta yama un expresion forma
semper pa un preposicion sigui pa un sustantivo cu na su
turno ta wordo sigui pa un di dos preposicion (Prep. 1 +
Sustantivo + Prep. 2), manera: a causa di, a peticion di, bou
di direccion di, cu cooperacion di, cu poder di, den transcurso
di, di parti di, en pugna cu, for di boca di, na comienso di, na
nomber di, pa cortesia di, pa medio di, pa motibo di y pa via di.
Den e publicacion aki, lo trata solamente preposicion simpel.
1.3 Clasificacion y uzo di preposicion simpel
1.3.1 Cerca
E preposicion cerca por denota un relacion di espacio of un
caracteristica.
I. Relacion di espacio
Den e relacion aki cerca ta indica un luga specifico den espacio:
1. Federico ta biba cerca su tata.
2. Pablo ta hungando cerca e bisiñanan.
3. Por haya mas informacion cerca Sra. Comenencia na
telefon [phone].
4. E bishe ta sinti su mes trankil cerca e baca pinta.
Cu verbo di movecion cerca ta denota un destinacion
specifico den espacio:
1. Kico Manolo a bay haci cerca su ruman homber?
2. Mi a pidi Francisca pasa cerca mi awe tardi.
3. Mi yiu, no yora mas, bin cerca tata.
4. E chuchubi a bula bay cerca e prikichi.
2 5. Ayera nos a bay cerca nos amigonan na Hotel Buena Vista.